Azərbaycan Respublikasının Prezidenti İlham Əliyevin 2020-ci il 2 dekabr tarixli Sərancamı ilə Vətən Müharibəsində qəhrəmancasına döyüşmüş, Azərbaycanın ərazi bütövlüyü uğrunda canlarını fəda etmiş bütün şəhidlərimizə dərin ehtiram əlaməti olaraq, hər il sentyabrın 27-si ölkəmizdə Anım Günü kimi qeyd olunur. 27 sentyabr müasir tariximizin şərəfli günüdür. Həmin gün Ermənistan ordusunun ölkəmizə qarşı başlayan növbəti hərbi təcavüzünə cavab olaraq, müzəffər ordumuz işğal altındakı torpaqlarımızın azad edilməsi məqsədilə Vətən Müharibəsinə başlayıb. Müharibə zamanı ordumuzun 3000-dən çox hərbi qulluqçusu şəhid olub, min nəfərdən artıq hərbiçimiz yaralanaraq sağlamlığını itirib.
Xatırladaq ki, 2021-ci ilin əvvəlində Milli Azərbaycan Tarixi Muzeyində Vətən müharibəsi fondu yaradılıb. Hazırda fondda 3251 sayda inventar nümunəsi mühafizə olunur. Muzeydə eksponatların gələcək nəsillərə ötürülməsi, şanlı tariximizin təbliği, əbədiləşdirilməsi istiqamətində bir sıra işlər görülüb. Həmin materialların bir qismi 19 may 2021-ci il tarixində Milli Azərbaycan Tarixi Muzeyində Azərbaycanın Vətən müharibəsində parlaq qələbəsi və torpaqlarımızın azad edilməsinə həsr olunmuş "Anadır arzulara hər zaman Qarabağ” adlı böyük sərgi keçirilmişdir. Qeyd edək ki, ölkədə ilk dəfə keçirilən həmin sərgi Vətən Müharibəsinin iştirakçılarına məxsus olmuş eksponatlar əsasında qurulmuşdur.
Şanlı tariximizi əks etdirən eksponatlar muzeyin yeni qurulan ekspozisiyasında da nümayiş olunacaq.