Milli Azərbaycan Tarixi Muzeyin qocaman əməkdaşı Faidə Abdullayeva 24 sentyabr 1938-ci il tarixində Bakı şəhərində anadan olub. 1953-cü ildə Bakı Kitabxanaçılıq Texnikumunda təhsil alıb, 1956-cı ildə həmin texnikumu bitirərək, Azərbaycan Tarix Muzeyində kitabxanaçı vəzifəsində çalışmağa başlayıb. 1970-1975-ci illərdə Azərbaycan Dövlət Universitetinin (indiki Bakı Dövlət Universiteti) filologiya fakültəsində təhsil alıb. 1992-ci ildə muzeyin Kitabxanasının müdiri vəzifəsinə təyin olunmuş və işinin öhdəsindən layiqincə gəlmiş Faidə Abdullayeva ixtisasına yüksək bələd olan bir insan kimi Kitabxanaya müraciət edənlərin, eyni zamanda muzeyin bütün əməkdaşlarının rəğbətini qazanmışdır. Çalışdığı müddət ərzində Faidə Abdullayevanın fəaliyyəti yüksək qiymətləndirilmiş, 2010-cu ildə Azərbaycan Respubikasının Prezidenti İlham Əliyevin sərəncamı ilə “Əməkdar mədəniyyət işçisi” adına layiq görülmüşdür.

Faidə Abdullayeva 2013-cü ildə muzeyin “Nadir kitablar” fondunun biblioqrafik göstəricisinin çapdan çıxdığı I cildinin tərtibçilərindən biri olmuşdur. Ömrünün çox hissəsini muzeyə həsr etmiş Faidə xanım muzey əməkdaşlarının yaddaşında işini dərindən bilən və sevən muzey fədaisi kimi qalacaq.

Qeyd edək ki, Faidə Abdullayevanın şəxsi əşyaları ailəsi tərəfindən muzeyin Köməkçi materiallar fonduna təqdim edilib.

Allah rəhmət eləsin!