Azərbaycanda şərqşünaslıq üzrə ilk qadın elmlər doktoru, professor Aida İmanquliyeva 10 oktyabr 1939-cu il tarixində Bakı şəhərində anadan olub. 132 nömrəli orta məktəbdə təhsil alıb. Həmin məktəbi 1957-ci ildə qızıl medalla bitirib və Azərbaycan  Dövlət Universitetinin (indiki Bakı Dövlət Universiteti) Şərqşünaslıq fakültəsinin ərəb filologiyası bölməsinə qəbul olunub. 1962-ci ildə universiteti bitirdikdən sonra həmin təhsil müəssisəsinin Yaxın Şərq xalqları ədəbiyyatı tarixi kafedrasının aspirantı olub, həmçinin keçmiş SSRİ EA Asiya Xalqları İnstitutunun aspiranturasında təhsil alıb.1966-cı ildə namizədlik dissertasiyasını müdafiə edən Aida İmanquliyeva Azərbaycan EA Şərqşünaslıq İnstitutunda əmək fəaliyyətinə başlayıb. O, istedadı, zəhmətsevərliyi sayəsində kiçik elmi işçidən şöbə müdiri, elmi işlər üzrə direktor müavini və İnstitutun direktoru vəzifəsinədək yüksəlib.

Çoxşaxəli yaradıcılığa malik olan professor Aida İmanquliyeva ictimai həyatda da geniş fəaliyyət dairəsinə sahib olub. Elmi fəaliyyətində üç monoqrafiya və 70-dən çox elmi məqalənin müəllifi olan Aida İmanquliyeva Şərq filologiyası sahəsində yazılmış bir çox elmi əsərlərin redaktoru olub. Akademikin apardığı tədqiqatlar və yazdığı əsərlər ölkə hüdudlarından kənarda da tanınıb.

Milli Azərbaycan Tarixi Muzeyinin Sənədli mənbələr fondunda qorunan, görkəmli şəxsiyyət Aida İmanquliyevaya aid dəyərli materialları təqdim edirik.