13-14 oktyabr tarixlərində Azərbaycan və Türk dünyasının mədəniyyət paytaxtı olan Şuşa şəhərində Azərbaycan Respublikası Mədəniyyət Nazirliyi, TÜRKSOY və Beynəlxalq Türk Akademiyasının təşkilatçılığı ilə Ümummilli lider Heydər Əliyevin 100 illiyinə həsr olunmuş “I Türk Dünyası Mədəniyyət Forumu” keçirilib. Forumda bir sıra mədəniyyət nümayəndələri, ictimai xadimlərlə yanaşı, Milli Azərbaycan Tarixi Muzeyinin direktoru, akademik Nailə Vəlixanlı iştirak edib. Forum iştirakçıları və qonaqlar Şuşa Yaradıcılıq Mərkəzini ziyarət edərək “Heydər Əliyev və Qarabağ” adlı sərgi ilə tanış olublar. Şuşanın tarixi yerlərinə ziyarət zamanı qonaqlara erməni vandalları tərəfindən işğal dönəmində məhv edilən mədəniyyət abidələrimiz, eləcə də qədim artefaktlarımızın saxtalaşdırılması barədə məlumat verilib. Bildirilib ki, Şuşa işğaldan azad edildikdən sonra burada tarixi və mədəniyyət abidələrinin genişmiqyaslı bərpa-quruculuq işlərinə start verilib.