Milli Azərbaycan Tarixi Muzeyinin arxeoloji kolleksiyasında dulus məmulatı çoxluq təşkil edir. Onların arasında antik dövrə məxsus nümunələr özünəməxsusluğu ilə seçilir. Belə nümunələrdən biri 1965-ci ildə arxeoloq Cabbar Xəlilov tərəfindən Şamaxı rayonunun Xınıslı nekropolundan tapılmış saxsı küpdür. Əldə formalaşdırılmış küpün ağzı qıfşəkillidir və ağzının kənarı ilə gövdəsinin çiyin hissəsini birləşdirən iki çubuq şəkilli yapması var. Yuxarı hissədə həmin çubuqvari yapmalar enlənmiş papaqla tamamlanır, altda isə kürə formasında olan gövdəyə yapılmış iki yarımhalqavari qulpu var. Tapılarkən fraqmentlərdən ibarət olsa da, sonradan muzeyin Bərpa laboratoriyasında bərpa edilərək, hazırki vəziyyətə gətirilmişdir. Küpün bədii tərtibatına və həcminə görə məişətdə istifadə olunması ehtimal edilir və maye saxlamaq, daşımaq üçün nəzərdə tutulub. Bu saxsı qab Azərbaycanın antik dövr məişəti ilə yanaşı, dulusçuların peşə bacarıqlarının səviyyəsi və bədii zövqü haqqında dolğun təsəvvür yaradır.

Qeyd edək ki, sözügedən saxsı küp muzeyin yeni açılacaq olan ekspozisiyasında nümayiş olunacaq.