Milli Azərbaycan Tarixi Muzeyinin İnnovasiyalar və təhsil proqramları şöbəsi tərəfindən Bakı şəhəri 189-190 saylı tam orta məktəbdə dəyirmi masa təşkil edilib. Bu məqsədlə muzeyin əməkdaşları- Qənirə Qafarlı və Kübra Dadaşova həmin məktəbdə olublar. Q.Qafarlı şagirdlərə “Qanlı Yanvar: Müstəqilliyə gedən yolda ümumxalq mübarizəsi” mövzusunda mühazirə deyib. Mühazirə zamanı muzeyin müvafiq fondlarında qorunan Qanlı Yanvar şəhidlərinin şəxsi əşyaları, tibbi ekspertiza rəyləri videoçarxla təqdim olunub. Mühazirəçi Qanlı Yanvar hadisələri zamanı xalqımızın başına gətirilən müsibətlərdən, Azərbaycan xalqının azadlıq mübarizəsindən danışıb. Q.Qafarlı, həmçinin həmin vaxt Ümummilli Lider Heydər Əliyevin Azərbaycanın Moskvadakı daimi nümayəndəliyinə gələrək, bu qanlı hadisəyə qarşı kəskin etirazını bildirdiyini vurğulayıb.
Sonda şagirdlərlə birlikdə fəal (interaktiv) təlim metodlarından biri olan BİBÖ ( Bilirəm/İstəyirəm bilim/Öyrəndim) üsulunun tətbiqi ilə diskussiya aparılıb.
