Bu gün Azərbaycan Silahlı Qüvvələrinin 2-ci Ordu Korpusunun Komandir müavini Şükür Həmidovun doğum günüdür. Şükür Həmidov 1975-ci il aprelin 1-də Qubadlı rayonunun Armudlu kəndində anadan olub. Azərbaycan Respublikasının Prezidenti İlham Əliyevin 20 aprel 2016-cı il tarixli Sərəncamına əsasən Şükür Həmidov 2016-cı ilin 2–5 aprelində baş verən Aprel döyüşlərində Cəbrayıl rayonu istiqamətində yerləşən "Lələtəpə" strateji nöqtəsinin alınması zamanı fərqlənməsinə görə Azərbaycanın Milli Qəhrəmanı adına layiq görülüb və ona "Qızıl Ulduz" medalı təqdim olunub. 2016-cı il mayın 10-da isə Müdafiə naziri Zakir Həsənovun əmrinə əsasən Şükür Həmidova vaxtından əvvəl növbəti "polkovnik" hərbi rütbəsi verilib. Həmçinin, Ş.Həmidov 2018-ci il iyunun 26-da Azərbaycan Silahlı Qüvvələrinin 100 illiyi münasibətilə təntənəli hərbi parad zamanı Azərbaycan Ordusunun 2016-cı ilin aprelində Füzuli, Cəbrayıl və Tərtər rayonlarının 800 ha.-dan çox ərazisinin işğaldan azad edilməsində xüsusi xidmətləri olan hərbi hissələrin və 2018-ci ilin mayında Naxçıvan MR ərazisində 10000 ha.-dan çox ərazinin işğaldan azad edilməsində fərqlənən Naxçıvan Əlahiddə Ümumqoşun Ordusunun hərbi hissələrin döyüş bayraqlarının olduğu bayraq qrupunun rəhbəri olmuşdur.

Polkovnik Şükür Həmidov 2020-ci ilin sentyabrında başlanan Vətən Müharibəsində Cəbrayıl, Füzuli və Qubadlıda gedən döyüşlərdə iştirak edib, oktyabrın 22-də isə doğulduğu Qubadlı rayonunun azadlığı uğrunda gedən döyüşlərdə ön xətdə qəhrəmancasına şəhid olub, Bakıda II Fəxri Xiyabanda dəfn edilib.

Milli Azərbaycan Tarixi Muzeyinin Vətən müharibəsi fondunda Milli Qəhrəman, şəhid Şükür Həmidovun şəxsi əşyaları qorunur (kamuflyaj rəngdə kitel, şalvar, hərbi yun sviter, istiləşdirilmiş gödəkçə, müxtəlif illərdə təltif olunduğu 10 ədəd fəxri fərman, hərbi çəkmə, baş geyimi, bel kəməri, hərbi əlcək, və üç ədəd fotoşəkil).

Qeyd edək ki, muzeyin Vətən Müharibəsinə həsr olunmuş bir çox sərgilərində şəhid Ş.Həmidovun şəxsi əşyaları nümayiş olunub.