Azərbaycan Respublikasının Prezidenti İlham Əliyevin 2024-cü ilin “Yaşıl dünya naminə həmrəylik ili” elan olunması ilə bağlı Sərəncamına əsasən tədbirlər planı çərçivəsində Milli Azərbaycan Tarixi Muzeyində “Yaşıl dünya” adlı layihəyə start verilib.

Tədbirdə Bakı şəhəri Tofiq İsmayılov adına 6 nömrəli məktəb-liseyin şagirdləri iştirak edib.

İki hissədən ibarət olan dərsin birinci hissəsində muzeyin Xüsusi fondunun müdiri t.ü.f.d., dosent Afət Rüstəmbəyova şagirdlərə məşhur xeyriyyəçi H.Z.Tağıyevin ev-muzeyinə ekskursiya  aparıb və böyük messenatın həyat və fəaliyyətindən bəhs edib. Eyni zamanda, şagirdlərə muzeyin yerləşdiyi binanın interyeri və eksteryeri haqqında ətraflı məlumat verib.

A.Rüstəmbəyova H.Z.Tağıyevin təşəbbüsü ilə açılan Mərdəkan bağçılıq məktəbi və onun Bakının ekologiyasının abadlaşdırılması istiqamətində gördüyü işlərdən danışıb.

Sonra uşaqlara ətraf mühitin sağlamlaşdırılması, yaşıllıqların bərpası və genişləndirilməsi haqqında maarifləndirici informasiya verib.

Dərsin ikinci,  praktiki hissəsində şagirdlər çiçək formasında olan gips fiqurların rənglənməsi üzrə ustad dərsi keçirilib.

Sonda şagirdlər üçün  interaktiv oyunlar təşkil olunub.