Vətən Müharibəsinin şəhidi mayor Vüsal Vəliyevə həsr olunmuş “Qisas – 44” (Bakı: “Savad”, 2022, 220 s., tərt. ed. Əpoş Vəliyev) adlı kitab şəhidin qardaşı f.ü.f.d. Əpoş Vəliyev (Elyar İslamoğlu) tərəfindən Milli Azərbaycan Tarixi Muzeyinə hədiyyə edilib. Kitabda şəhid mayor Vüsal Vəliyevə həsr olunmuş məqalələr, şeirlər, poemalar, xatirələr, şəkillər yer alıb.

Şəhid mayor Vüsal Vəliyev 1988-ci il iyulun 15-də Şərur rayonunun Dizə kəndində anadan olub. 1994-2002-ci illərdə Dizə kənd tam orta məktəbində, 2002-2005-ci illərdə Heydər Əliyev adına Hərbi Liseydə təhsil alıb. 2005-2009-cu illərdə Heydər Əliyev adına Ali Hərbi Məktəbdə təhsil alıb. Xüsusi Təyinatlı Qüvvələrdə təlimini uğurla başa vurub.

Vüsal Vəliyev 2020-ci il sentyabrın 27-də başlanan Vətən müharibəsi zamanı həmlə taborunun komandiri olaraq iştirak edib. Noyabrın 9-da Şuşa uğrunda gedən döyüşlər zamanı şəhid olub. 14 dekabrda Şərur şəhərindəki Şəhidlər xiyabanında dəfn olunub.

Mayor Vüsal Vəliyev hərbi xidmət dövründə “Azərbaycan Respublikası Silahlı Qüvvələrinin 95 illiyi (1928-2013) Yubiley medalı”,  “Azərbaycan Ordusunun 100 illiyi (1918-2018) Yubiley Medalı”,  “10 il Qüsursuz xidmətlərə görə” 3-cü dərəcəli medalla təltif olunub.

Azərbaycan Respublikasının Prezidenti İlham Əliyevin sərəncamına əsasən mayor Vüsal Vəliyev ölümündən  sonra "Vətən uğrunda", “Kəlbəcərin azad olunmasına görə”, “İgidliyə görə” medalları və “Azərbaycan bayrağı” ordeni ilə təltif edilib.