Tədbirin birinci hissəsində 5 nömrəli Uşaq-Gənclər İnkişaf Mərkəzinin şagirdlərinin muzey eksponatları əsasında çəkdikəri rəsm əsərlərindən ibarət sərgiyə baxış keçirilib.

Muzeyin İnnovasiyalar və təhsil proqramları şöbəsinin müdiri Fəridə Şəmsi tədbiri giriş sözü ilə açaraq, qeyd edib ki, 2020-ci ildən başlayan bu layihədə Respublikanın 100-ə yaxın ümumtəhsil məktəbi, müxtəlif təşkilatlar və sağlamlıq imkanları məhdud uşaqlar iştirak edib. F.Şəmsi çıxışında "həm də bu layihənin hər il 18 may-Beynəlxalq Muzeylər Günü ərəfəsində keçirildiyini və bu ilin devizinin “Muzeylərdə təhsil və tədqiqat” olduğunu vurğulayıb. Sonra çıxış edən Arxeologiya elmi fond şöbəsinin müdiri, tarix üzrə fəlsəfə doktoru, dosent Nasir Quluzadə muzeyin Arxeologiya fondunda qorunan Naxçıvan inciləri haqqında, Etnoqrafiya elmi fond şöbəsinin müdiri, tarix üzrə fəlsəfə doktoru, dosent Gülzadə Abdulova isə muzeyin Etnoqrafiya fondunda qorunan Naxçıvana aid etnoqrafik materiallar haqqında məlumat verib. Tədbirdə 5 nömrəli Uşaq-Gənclər İnkişaf Mərkəzinin direktor müavini Aynurə Məlikova çıxış edərək, tədbirdə həm də sağlamlıq imkanları məhdud uşaqların iştirak etdiyini vurğulayıb və onların muzeyə cəlb olunması, cəmiyyətə inteqrasiyası üçün belə stimullaşdırıcı layihələrin vacibliyini qeyd edib. Daha sonra çıxış edən muzeyin İnnovasiyalar və təhsil proqramları şöbəsinin baş mütəxəssisi, sözügedən layihənin rəhbəri Qənirə Qafarlı layihənin keçirilməsində dəstək olan hər kəsə təşəkkürünü bildirərək, belə layihələrin muzey-təhsil əlaqələrinin möhkəmləndirilməsi və muzey eksponatlarının təbliği məqsədilə keçirildiyini bildirib.

Sonda Bədii hissə nümayiş olunub. Bədii hissədə Badamdar qəsəbə Mədəniyyət evinin üzvlərinin və Ş.Ələkbərova adına 20 nömrəli Onbirillik Musiqi Məktəbinin şagirdlərinin ifasında musiqi və rəqs nömrələri nümayiş olunub. Layihədə iştirak edən gənc rəssamlar, müəllimlər, bədii hissə iştirakçıları sertifikat və təşəkkürnamələr ilə təltif olunub.

Xatırladaq ki, sözügedən layihə çərçivəsində 2020-ci ildən etibarən hər il 18 may-Beynəlxalq Muzeylər Günü ərəfəsində tədbirlər keçirilir.