Milli Azərbaycan Tarixi Muzeyi Yeni Azərbaycan Partiyası Səbail rayon təşkilatı ilə birgə muzeydə 28 May - Müstəqillik Gününə həsr olunmuş tədbir keçirilib.

Azərbaycan Respublikasının Dövlət Himni səsləndirildikdən sonra iştirakçılar Ulu öndər Heydər Əliyevin və Azərbaycanın ərazi bütövlüyü uğrunda şəhid olmuş hərbiçilərimizin xatirəsini bir dəqiqəlik sükutla yad ediblər.

Sonra Milli Azərbaycan Tarixi Muzeyinin direktoru, akademik Nailə Vəlixanlı, Yeni Azərbaycan Partiyası Səbail rayon təşkilatının sədri Muxtar Nağıyev, muzeyin elmi işlər üzrə direktor müavini, t.ü.f.d, Fərhad Cabbarov,  Azərbaycan Milli Elmlər Akademiyası A.Bakıxanov adına Tarix İnstitunun elmi işlər üzrə direktor müavini, professor Cəbi Bəhramov 28 May- Müstəqillik Günü ilə əlaqədar çıxış edərək, Azərbaycan Cümhuriyyətinin çətin və şərəfli yollar keçərək qurulduğunu, bu əlamətdar günün hər bir azərbaycanlı üçün qürurverici olduğunu qeyd ediblər. Həmçinin, Ümummilli Lider Heydər Əliyevin möhkəm təməllər üzərində qurduğu dövlətimizin bu gün Azərbaycan Respublikasının Prezidenti İlham Əliyevin uzaqgörən siyasəti ilə inkişaf etdiyini vurğulayıblar.

Sonda qonaqlar muzeyin yeni ekspozisiyasının Azərbaycan Cümhuriyyəti dövrünə həsr olunmuş zalında nümayiş olunan eksponatlar ilə tanış olub.