Bu gün, 15 iyun Azərbaycan xalqının milli birliyini, dövlətçilik iradəsini və müstəqillik yolunda qətiyyətini simvollaşdıran Milli Qurtuluş Günüdür.

1993-cü ilin iyun ayında Azərbaycan ciddi siyasi və iqtisadi böhran içərisində idi. I Qarabağ Müharibəsi nəticəsində ölkə ağır itkilər vermiş, daxili siyasi münaqişələr və iqtisadi problemlər böhranı dərinləşdirmişdi. Bu çətin şəraitdə, xalqın istəyi ilə Ulu öndər Heydər Əliyev Bakıya qayıtdı və 15 iyun 1993-cü ildə Azərbaycan Ali Sovetinin sədri seçildi. Onun rəhbərliyi altında ölkədə siyasi sabitlik bərpa olundu,  iqtisadiyyat yenidən quruldu və dövlətçiliyin əsasları möhkəmləndirildi.

1997-ci ildə parlamentin qəbul etdiyi qərara əsasən 15 iyun ölkəmizdə Milli Qurtuluş Günü kimi qeyd olunur.

Əlamətdar günlə bağlı Milli Azərbaycan Tarixi Muzeyinin yeni ekspozisiyasında nümayiş olunan Ümumilli lider Heydər Əliyevin hakimiyyətdə olduğu  dövrünü əks etdirən dəyərli eksponatları təqdim edirik.