Milli Azərbaycan Tarixi Muzeyinin təşkilatçılığı, “East Gold” Məhdud Məsuliyyətli Cəmiyyətin dəstəyi ilə muzeyin rəsmi “İnstagram” səhifəsində sosial şəbəkələr vasitəsilə muzeyin elmi ekspozisiyasında nümayiş olunan tarixi artefaktları geniş auditoriyaya çatdırmaq, xüsusilə gənclərin tariximizə marağını artırmaq məqsədilə keçirilmiş “Muzeydə bir an” fotomüsabiqəsinin nəticələri elan edilib. Müsabiqə çərçivəsində ilk dəfə olaraq #muzeydebiran həştəqi vasitəsilə “İnstagram” platformasında Milli Azərbaycan Tarixi Muzeyinin zəngin ekspozisiyasında çəkilmiş 50-dən çox foto və video paylaşımı edilib. Qeyd edək ki, 16 may 2024-cü il tarixində start verilmiş, Beynəlxalq Muzeylər Gününə həsr olunmuş müsabiqənin #muzeydebiran həştəqi muzeysevərlər tərəfindən bəyənilərək digər muzeylərin sosial şəbəkə hesablarında da istifadə olunmuşdur. Müsabiqənin qalibləri paylaşımların topladığı bəyəni sayı ilə müəyyənləşib. Belə ki, birinci yerin qalibi #alchin._ profilinin sahibi Sevinc Qasımova, ikinci yerin qalibi #_laladesign profilinin sahibi Lalə Məmmədova, üçüncü yerin qalibi #fizika_hazirliq_merkezi profilinin sahibi Gülay Rüstəmli olub. Qaliblərə “East Gold” Məhdud Məsuliyyətli Cəmiyyəti tərəfindən xüsusi tərtibatla hazırlanmış hədiyyəlik qızıl külçələr təqdim edilib. Milli Azərbaycan Tarixi Muzeyi qalibləri təbrik edir və müsabiqədə iştirak etmiş hər kəsə öz minnətdarlığını bildirir.