Azərbaycanın tanınmış rəssamı, heykəltaraşı Tokay Məmmədov 1927-ci il iyul ayının 18-də Bakıda anadan olub. Tokay Məmmədov Əzim Əzimzadə adına Bakı Rəssamlıq Məktəbini bitirdikdən sonra Leninqradda (Sankt-Peterburq) İlya Repin adına Rəssamlıq Akademiyasının Heykəltəraşlıq fakültəsinə qəbul olub və ali təhsilini bitirdikdən sonra isə həmin şəhərdə heykəltəraş kimi fəaliyyət göstərib. Azəraycan Rəssamlar İttifaqına üzv seçilən Tokay Məmmədov heykəltaraşlıq fəaliyyətini uğurla davam etdirib, bir sıra şair, alim, dövlət xadimi eləcə də öz sənət dostlarının büst portretlərini hazırlayıb. Azərbaycan heykəltaraşlığında ilk dəfə ağac materialdan istifadə edən Tokay Məmmədov bu istiqamətdə yaradıcılığını uğurla davam etdirib. Tokay Məmmədovun yaradıcılığı hər zaman diqqət mərkəzində olub və daim yüksək qiymətləndirilib. O, bir çox ölkələrin mükafatları ilə təltif edilib. Müstəqil Azərbaycan Respublikasının ali mükafatlarından “Şərəf” və “Şöhrət” ordenlərinə, “Azərbaycan Respublikası Prezidentinin fəxri diplomu”na layiq görülüb.

Tokay Məmmədovun doğum günü ilə əlaqədar Milli Azərbaycan Tarixi Muzeyinin Fotoneqativ materilları fondunda qorunan materialları təqdim edirik.