Avqustun 1-i Azərbaycan əlifbası və Azərbaycan dili günüdür. Ümumilli Lider Heydər Əliyevin 2001-ci ildə imzaladığı Fərmana əsasən, avqustun 1-i respublikamızda Azərbaycan Əlifbası və Azərbaycan dili Günü kimi qeyd edilir.
Əlifba hər bir xalqın həyatında və onun yazı mədəniyyətinin formalaşmasında mühüm rol oynayır. Əlifba sadəcə hərflərin yığımı deyil, eyni zamanda xalqın tarixi, mədəniyyəti və kimliyinin göstəricisidir.
Əlamətdar günlə bağlı Milli Azərbaycan Tarixi Muzeyinin yeni ekspozisiyasından Azərbaycan milli dramaturgiyasının banisi Mirzə Fətəli Axundzadəyə həsr olunmuş vitrində yer alan tarixi əhəmiyyətli əlifba layihəsinin fotosurətini təqdim edirik.
1863-cü ildə İstanbulda yeni əlifba layihəsini şəxsən təqdim edən M.F.Axundzadə ərəb əlifbasının latın qrafikalı yeni əlifba ilə əvəz olunmasının vacibliyinə dair türk alimlərinə məlumat verib. Həmçinin, bu barədə dünyanın bir sıra şəhərlərinə mütəxəssislərin rəyini alması üçün səfər edib. Ancaq layihənin qəbul olunmaması onu ruhdan salmayıb, M.F. Axundzadə gələcək nəslin həmin layihəni layiqincə qiymətləndirəcəyinə inanıb.
