Yasən Yelmar oğlu Əhmədov 16 sentyabr 1974-cü il tarixində Ağdam rayonunun Kosalar kəndində anadan olub. 1981-1991-ci illərdə Ağdam rayonu Eyvazxanlı kənd tam orta məktəbində təhsil alıb.

Yasən Əhmədov 1992-ci ildə Birinci Qarabağ Müharibəsi zamanı Ağdam rayonunun "N" saylı hərbi hissəsinin özünümüdafiə batalyonunda xidmətə başlayıb. 1993-cü ildə Ağdam Hərbi Komissarlığı tərəfindən müddətli həqiqi hərbi xidmətə çağırılıb və 1994-cü ildə Müdafiə Nazirliyinin əmrinə əsasən "baş çavuş" hərbi rütbəsi alaraq, Motoatıcı Bölüyün Komandiri vəzifəsinə təyin olunub. 1993-2002-ci illərdə "N" saylı hərbi hissədə müxtəlif vəzifələrdə xidmət edən Yasən Əhmədov, 2002-ci ildə ehtiyata buraxılıb. 2004-2006-cı illərdə Ədliyyə Nazirliyinin Penitensiar Xidmətinin 10 saylı CM-də təsərrüfat işləri üzrə rəis müavini vəzifəsində olan Yasən Əhmədov 2006-cı ildə yenidən Azərbaycan Silahlı Qüvvələrinin sıralarında xidmətə başlayıb və təyinata əsasən Ağdam rayonunda yerləşən "N" saylı hərbi hissədə, 2017-ci ildən Gəncə şəhərində yerləşən "N" saylı hərbi hissədə xidmətini davam etdirib.

Yasən Əhmədov 2020-ci il sentyabrın 27-də başlanan Vətən Müharibəsi zamanı Talış qəsəbəsinin azadlığı uğrunda gedən döyüşlərdə iştirak edib və ağır yaralanıb. Hərbi Hospitalda 14 gün koma vəziyyətində qalan Yasən Əhmədov oktyabrın 23-də şəhid olub, Mingəçevir şəhərinin Şəhidlər Xiyabanında dəfn olunub.

Milli Azərbaycan Tarixi Muzeyinin Vətən Müharibəsi fondunda Yasən Əhmədova məxsus şəxsi materiallar (müharibə zamanı istifadə etdiyi hərbi zirehli gödəkçə və 9 ədəd fotoşəkili, şəhid polkovnik-leytenant Raquf Orucovla və hərbi xidməti dövründə hərbçi yoldaşları ilə çəkilmiş fotoları) mühafizə olunur.