Milli Azərbaycan Tarixi Muzeyində İdrak liseyinin 9-cu sinif şagirdlərinin iştirakı ilə 18 oktyabr - Müstəqilliyin Bərpası Gününə həsr olunmuş “Müstəqilliyə gedən yol” adlı tədbir - intellektual bilik yarışı keçirilib.
Tədbir Azərbaycan Respublikasının Dövlət Himninin səsləndirilməsi ilə başlayıb. Sonra muzeyin İnnovasiyalar və təhsil proqramları şöbəsinin əməkdaşı Aynur Babayeva “Müstəqillik xalqımızın ən böyük sərvətidir” adlı məruzə ilə çıxışında şagirdlərə müstəqillik dövrü ilə bağlı tarixi hadisələr haqqında ətraflı məlumat verib (foto-slaydın nümayişi ilə).
Daha sonra şagirdlər arasında Müstəqilliyin Bərpası Gününə həsr olunmuş intellektual bilik yarışı keçirilib. Üç komanda – “Zəfər”, “Müstəqillik”, “Qarabağ” komandaları arasında keçirilən yarışda iştirakçılardan suallara ən tez və düzgün cavab verən “Müstəqillik” komandası qalib seçilib.
Sonda iştirakçılara muzeyin Azərbaycanın müstəqillik dövrü tarixini əks etdirən ekspozisiya zallarında, H.Z.Tağıyevin ev muzeyində ekskursiya aparılıb və xatirə fotosu çəkilib.
