28 oktyabr 2020-ci ildə Vətən Müharibəsi zamanı Ermənistan Silahlı Qüvvələri tərəfindən Bərdə şəhərinin dinc sakinlərinin sıx hərəkətdə olduğu və ticarət obyektlərinin kompakt yerləşdiyi əraziyə “Smerç” tipli raketinin atılması nəticəsində 5-i qadın olmaqla, 21 nəfər həlak olmuş, 8-i uşaq, 15-i qadın olmaqla, 70 şəxs isə müxtəlif dərəcəli bədən xəsarətləri almışdır. Eyni zamanda, 30-dan artıq mülki infrastruktur obyektinə, dinc sakinlərə məxsus 20-dən çox fərdi yaşayış evlərinə və 22 nəqliyyat vasitəsinə külli miqdarda ziyan dəymişdir.
Həmin raketin qalığı 2021-ci il tarixində ANAMA tərəfindən Milli Azərbaycan Tarixi Muzeyinə Vətən Müharibəsi fondunda daimi saxlanılmağa verilib. Smerç raketinin qalığının diametri-27 sm, uzunluğu – 2.53 metrdir.
Sözügedən raketin qalığı muzeydə 2021-ci ildə təşkil edilən “Anadır arzulara hər zaman Qarabağ” adlı sərgidə ictimaiyyətə təqdim olunub. Hazırda isə muzeyin elmi ekspozisiyanın “Zəfər “ zalında nümayiş olunur.