27 sentyabr 2020-ci il tarixində Azərbaycan Respublikasının Prezidenti, Ali Baş Komandan İlham Əliyevin rəhbərliyi, Azərbaycan Silahlı Qüvvələrinin hərbi gücü ilə ölkəmizin ərazi bütövlüyü uğrunda başlamış Vətən Müharibəsində ordumuzun döyüş meydanında əldə etdiyi parlaq qələbə tarixi torpaqlarımızın 30 illik işğaldan azad edilməsinə yol açdı. Ölkəmizin işğal altında olan ərazisinin böyük bir hissəsinin, xüsusilə 8 noyabr tarixində Şuşanın düşmən işğalından azad olunması müharibənin taleyində həlledici rol oynadı.
Prezident İlham Əliyevin imzaladığı Sərəncama əsasən, 8 noyabr hər il ölkəmizdə Zəfər Günü kimi qeyd olunur.
Qeyd edək ki, 2021-ci ildən Milli Azərbaycan Tarixi Muzeyində şanlı zəfərimizin əbədiləşdirilməsi və gələcək nəsillərə ötürülməsi məqsədilə Vətən Müharibəsi fondu fəaliyyət göstərir. Fondda şəhid və qazilərimizin şəxsi əşyalarının sayı 3000-i keçib.
Əlamətdar günlə bağlı muzeyin yeni ekspozisiyasının Vətən Müharibəsinə həsr olunmuş Zəfər zalında nümayiş olunan eksponatları təqdim edirik.
