Medianın İnkişafı Agentliyi və COP29 Əməliyyat Şirkətinin birgə təşkilatçılığı ilə ölkəmizdə səfərdə olan xarici media nümayəndələri üçün mediatur təşkil olunub. Mediatur qədim zamanlardan bugünədək Azərbaycan tarixini əks etdirən Milli Azərbaycan Tarixi Muzeyindən başlayıb. Xarici jurnalistlər muzeyin yeni ekspozisiyası, ölkəmizin keçmişini özündə canlandıran müxtəlif arxeoloji, etnoqrafik materiallar, eksponatlarla yaxından tanış olublar. Qonaqlara Azərbaycanın qədim yaşayış məskənlərindən tapılmış arxeoloji nümunələr, milli geyimlər, bədii tikmələr, məişət əşyaları və digər tarixi əşyalar nümayiş etdirilib. Daha sonra xarici media nümayəndələri Hacı Zeynalabdin Tağıyevin ev-muzeyinə ekskursiya edərək, məşhur xeyriyyəçinin həyatı və fəaliyyəti haqqında məlumat əldə ediblər. Muzeyin unikal ekspozisiyası, Azərbaycanın müxtəlif sahələrdə qazandığı uğurlar qonaqlarda geniş təsəvvür yaradıb. Sonda mediatur iştirakçıları Azərbaycanın mədəni irsi ilə tanışlığın onlarda böyük təəssürat yaratdığını və bu məlumatları öz platformalarında geniş şəkildə işıqlandıracaqlarını bildiriblər.