Milli Azərbaycan Tarixi Muzeyinin Xüsusi fondunda qədim dövrdən XX əsrə qədərki dövrə aid olan çox sayda tapıntı mövcuddur. Azərbaycanda bədii metal sənətinin tarixi kökləri metalişləmənin erkən təşəkkül mərhələsi ilə bağlı olsa da, zərgərlik məmulatı istehsalının inkişafı nisbətən sonrakı dövrlərə təsadüf edir. Azərbaycan ərazisində aparılan arxeoloji qazıntılar nəticəsində aşkar olunan müxtəlif çeşiddə qızıl və gümüş məmulatı- baş bəzəyi, bilərzik, toqqa, boyunbağı, üzük, sırğa və s. yerli sənətkarların ustalığından, onların texniki cəhətdən yüksək inkişaf səviyyəsindən xəbər verir.
Təqdim olunan XIX əsrə aid baş bəzəyi unikallığı ilə seçilir. Baş bəzəyi bir-birinə bərkidilmiş, yuxarısı dalğa şəkilli və günbəzvari başlıqlı üç oynaq lövhədən ibarətdir. Lövhələr şəbəkə fonunda dənəciklərlə tamamlanan iri “vov”larla, ətəyi isə dənəcikli “badam” asmalarla bəzədilib.