Azərbaycan Milli Xalça Muzeyində Ümummilli lider Heydər Əliyevin 100 illik yubileyinə həsr olunmuş “Dövlətin memarı. Bir ömrün ensiklopediyası” adlı unikal xalçanın növbəti təqdimatı keçirilib. Təqdimat mərasimində Milli Azərbaycan Tarixi Muzeyinin direktoru, akademik Nailə Vəlixanlı, muzey eksponatlarının qorunması və qeydiyyatı üzrə direktor müavini, baş mühafiz, t.ü.f.d., dosent Məhfuzə Zeynalova iştirak ediblər.
Azərbaycan Milli Xalça Muzeyinin direktoru Əminə Məlikova təqdimat mərasimində çıxış edərək, qonaqları salamlayıb və bu nadir sənət əsərinin muzeydə sərgilənməsini əlamətdar hadisə olduğunu vurğulayıb.
Daha sonra Mədəniyyət naziri Adil Kərimli çıxış edərək, Ulu öndər Heydər Əliyevə həsr olunmuş “Dövlətin memarı. Bir ömrün ensiklopediyası” triptix-xalçanı qədim milli xalça sənətinin ən yaxşı ənənələrinin davamı kimi qiymətləndirib: “Bu triptix-xalça, əslində, Ulu öndərin həyatının, amalının xalça dilində kodlaşdırılmış hekayəsidir. Bu əsər yeni olsa da, qədim mədəni irsin daşıyıcısıdır”.
Sonra Azərxalça ASC İdarə Heyətinin sədri, ensiklopedik xatirə xalça kompozisiyasının müəllifləri – Əməkdar incəsənət xadimi Emin Məmmədov və Əməkdar rəssam Rəşad Ələkbərov xalça üzərində necə çalışdıqları barədə geniş məlumat veriblər.