Naxçıvan Muxtar Respublikasının 100 illik yubileyinin qeyd edilməsi haqqında Azərbaycan Respublikası Prezidenti İlham Əliyevin Sərəncamına əsasən tədbirlər çərçivəsində Milli Azərbaycan Tarixi Muzeyində “Elmi macəralar saatı“ layihəsi əsasında 5 nömrəli Uşaq-Gənclər İnkişaf Mərkəzinin şagirdlərinə “Naxçıvanın qədim mədəniyyəti Milli Azərbaycan Tarix Muzeyinin eksponatlarında” adlı mühazirə keçirilib. Mühazirə muzeyin Arxeologiya elmi fond şöbəsinin müdiri t.ü.f.d, dosent Nasir Quluzadə tərəfindən keçirilib.
N.Quluzadə mühazirəsində qeyd edib ki, muzeyin Arxeologiya fondunda mühafizə olunan arxeoloji materialların bir qismini Naxçıvan tapıntıları təşkil edir. Eneolitdən başlayaraq Orta əsrlər dövrünədək böyük bir mərhələni əhatə edən bu tapıntılar I Kültəpə, II Kültəpə, Şahtaxtı, Qızılburun (Qızılvəng), Naxçıvan, Danaqırd və Xaraba Gilan abidələrindən aşkar olunub. Tədqiqatçı alim N.Quluzadə arxeoloji tapıntıların Naxçıvanın qədim şəhər mədəniyyətinin öyrənilməsində də çox böyük əhəmiyyəti olduğunu vurğulayıb.
Mühazirə iştirakçılar tərəfindən maraqla qarşılanıb və verilən suallar ətraflı cavablandırılıb.