Azərbaycanın hərb tarixində şərəfli iz qoymuş Sovet İttifaqı Qəhrəmanı Mehdi Hüseynzadənin xatirəsinə həsr edilmiş filmin bir hissəsi Milli Azərbaycan Tarixi Muzeyində çəkildi. Çəkilişlərdə muzeyin Beynəlxalq əlaqələr və ictimaiyyətlə iş şöbəsinin əməkdaşı, t.ü.f.d. Fuad Ağayev,  AMEA Fəlsəfə və Sosiologiya İnstitutunun baş elmi işçisi, sosioloq, fəlsəfə üzrə fəlsəfə doktoru İlham Abbasov və Mehdi Hüseynzadənin bacısının oğlu Hənifə Əlizadə iştirak etmişlər.

Filmin çəkilişləri zamanı Fuad Ağayev Mehdi Hüseynzadəyə aid muzeydə qorunan unikal kolleksiya haqqında ətraflı məlumat vermiş və qəhrəmanın həyat yolundan maraqlı faktları təqdim etmişdir.

Çəkilişlər Rusiyanın “Zvezda” telekanalında yayımlanan “Ordu Əfsanələri” ("Легенды армии") adlı verilişlər silsiləsinin bir hissəsi kimi həyata keçirilmişdir. Bu proqram Böyük Vətən Müharibəsi qəhrəmanlarına həsr olunub və müharibənin tarixində mühüm rol oynamış insanların həyatını, döyüşlərini və qəhrəmanlıq hekayələrini işıqlandırır. Belə layihələr Mehdi Hüseynzadə kimi şəxsiyyətlərin həyatını beynəlxalq miqyasda tanıtmaq üçün önəmli təşəbbüsdür.