Bu gün, 25 yanvar, Azərbaycanın görkəmli hərbi xadimi, İkinci Dünya Müharibəsinin qəhrəmanlarından biri, iki dəfə Sovet İttifaqı Qəhrəmanı adına layiq görülmüş, Tank Qüvvələrinin general-mayoru Həzi Əhəd oğlu Aslanovun həlak olmasından 80 il keçir.

Milli Azərbaycan Tarixi Muzeyində Həzi Aslanovun şanlı döyüş yolunu və həyatını əks etdirən dəyərli materiallar nümayiş olunur. Muzeyin ekspozisiyasında general-mayora məxsus hərbi forma (şinel, şalvar, çəkmə, papaq və s.), müxtəlif orden və medalları və.s. ziyarətçilərə təqdim edilir.

Bundan başqa, Həzi Aslanovun xatirəsinə aid olan çoxsaylı qiymətli materiallar muzeyin fondlarında qorunur. Burada onun şəxsi sənədləri, nadir fotoşəkilləri, yazışmaları və digər tarixi əşyaları saxlanılır.

Milli Azərbaycan Tarixi Muzeyi Azərbaycanın İkinci Dünya Müharibəsindəki iştirakına dair ən zəngin materiallar toplusuna və kolleksiyalara malik olan, ölkənin ən böyük muzey müəssisələrindən biri kimi fərqlənir. Muzey Həzi Aslanov kimi qəhrəmanların həyatını və xidmətlərini yaşatmaqla yanaşı, gələcək nəsillərə ötürülməsinə töhfə verir.