Azərbaycanda qədim dövrlərdən bəri atlar insanların həm hərbi, həm də gündəlik məişət həyatında mühüm rol oynayıb. Onlar döyüşlərdə süvarilərin əsas nəqliyyat vasitəsi olmaqla yanaşı, təsərrüfat işlərində və yük daşımada da geniş istifadə olunub. Eyni zamanda, atların bəzədilməsində istifadə olunan yəhərüstü, aksesuarlar və bəzək elementləri sahibinin statusunu əks etdirib.

Milli Azərbaycan Tarixi Muzeyinin Etnoqrafiya fondunda qorunan və XX əsrin əvvəllərinə aid olan nadir yəhərüstü nümunəsi hazırda muzeyin ekspozisiyasında ziyarətçilərə təqdim olunur. Qara mahuddan hazırlanan bu yəhərüstü açıq yaşıl rəngli ipək saçaqlarla haşiyələnib. Onun üzəri incə təkəlduz tikmələrlə işlənib və üç enli zolaqdan ibarət ara sahəsi nəbati naxışlarla bəzədilib. Bu unikal eksponatın üzərində əjdaha, quşlar, ceyranlar və vəhşi heyvan təsvirləri yer alır ki, bu da Azərbaycan xalqının qədim mifoloji inancları və dekorativ-tətbiqi sənətində heyvan təsvirlərinin xüsusi yer tutduğunu göstərir.