Milli Azərbaycan Tarixi Muzeyi beynəlxalq əməkdaşlıq çərçivəsində muzey sahəsində çalışan nüfuzlu şəxsləri qəbul etməyə davam edir. Bu dəfə muzeyin qonağı Türkiyə Mədəniyyət və Turizm Nazirliyinin Muzeylər şöbəsinin müdir müavini, Beynəlxalq Muzeylər Şurası (ICOM) Türkiyə Milli Komitəsinin sədr müavini, tanınmış arxeoloq Bülent Gönültaş olub. Muzeyin direktoru, akademik Nailə Vəlixanlı qonağı muzeydə görməkdən məmnun olduğunu bildirib və Azərbaycanın mədəni irsinin qorunması istiqamətində görülən işlərdən danışıb. Görüş zamanı Bülent Gönültaşa muzeyin tarixi binası, ekspozisiya zallarında nümayiş olunan unikal eksponatlar və Azərbaycanın zəngin tarixi-mədəni irsi haqqında geniş məlumat verilib. Ziyarət zamanı Bülent Gönültaş muzeyin ekspozisiyasını yüksək qiymətləndirərək, həm eksponat zənginliyi, həm də onların təqdimat formasını dəyərləndirib. O, xüsusilə muzeyin qədim tarixdən müasir dövrə qədər olan geniş zaman çərçivəsini əhatə etməsini və eksponatların elmi əsaslarla sistemləşdirilməsini yüksək dəyərləndirib. Bu görüş Azərbaycan və Türkiyə arasında mədəni irsin qorunması və muzey sahəsində əməkdaşlığın daha da inkişaf etdirilməsi baxımından mühüm addım kimi qiymətləndirilir.