Mədəniyyət Nazirliyinin Mədəniyyət üzrə Elmi-Metodiki və İxtisasartırma Mərkəzi (MEMİM) “Mədəniyyətin pərdəarxası: jurnalistikanın sirləri” adlı yeni layihəyə başlayıb. Layihənin məqsədi gənc jurnalistlərin mədəniyyət jurnalistikasına marağını artırmaq, bu istiqamətdə fəaliyyətlərini genişləndirmək və praktiki biliklər qazandırmaqdan ibarətdir. Azərbaycan Musiqi Mədəniyyəti Dövlət Muzeyində baş tutan tədbirdə “Trend” Beynəlxalq İnformasiya Agentliyinin Mədəniyyət şöbəsinin rəhbəri, jurnalist Vüqar İmanovun iştirakı ilə seminar təşkil olunmuşdur. Sözügedən tədbirdə Milli Azərbaycan Tarixi Muzeyinin Beynəlxalq əlaqələr və ictimaiyyətlə iş şöbəsinin tərcüməçisi Ayəndə Dadaşova iştirak edib. Seminar zamanı jurnalistika mədəniyyəti, xarici dillərin öyrənilməsi, tənqiddən çəkinməmək, xəbərləri lakonik çatdırılma bacarığı və s. haqqında bəhs edilib. Vüqar İmanov sözügedən seminarda müasir texnologiyanın jurnalistika sahəsinə gətirdiyi müsbət və mənfi cəhətlərdən, milli-mənəvi dəyərlərin təbliğində jurnalistikanın əhəmiyyətindən, mədəniyyət jurnalistikasının öyrədici-maarifləndirici xüsusiyyətləri və gənc nəslin əsl peşəkar kimi formalaşmasından söhbət açıb.