Milli Azərbaycan Tarixi Muzeyinin zəngin kolleksiyası əsasında “Boğçalar” adlı yeni kataloqu işıq üzü görüb. Kataloqun elmi redaktoru muzeyin Etnoqrafiya elmi fond şöbəsinin müdiri, t.ü.f.d., dosent Gülzadə Abdulova, rəyçi muzeyin elmi katibi, t.ü.f.d, dosent Sevinc Nəsirova, müəllifi həmin şöbənin əməkdaşı Nurəngiz Qarayevadır.
Kataloqda muzeyin Etnoqrafiya fondunda qorunan ipək, darayı, qələmkar, qurama, tirmə, pilək tikməli, zərxara boğçalar və onlarla bağlı məlumatlar yer alıb.
Boğça qədim zamanlardan əşyaların qorunması və daşınması üçün istifadə edilən əsas məişət elementlərindən biridir. Tarix boyu müxtəlif ölçülərdə və formalarda hazırlanan boğçalar geyim, zinət əşyaları və digər məişət əşyalarının saxlanması üçün istifadə olunub. Arxeoloji qazıntılar və tarixi mənbələr Azərbaycanda toxuculuğun və parçadan istifadə ənənələrinin çox qədim olduğunu təsdiqləyir. Müasir dövrdə boğçalar daha çox toy və nişan mərasimlərində, həmçinin milli dəyərlərin qorunmasında istifadə olunur.
