Moskvada “Rusiya tarixində Şərq zinətləri. Orta əsrlər dövrü və onun arxeoloji göstəriciləri” adlı konfrans keçirilib. Konfransda Milli Azərbaycan Tarixi Muzeyinin Numizmatika fondunun baş mütəxəssisi, t.ü.f.d. Aygün Məmmədova “Şəmkir orta əsr şəhərgahının numizmatik tapıntıları” (rus dilində) adlı mövzuda məruzə edib (onlayn). A.Məmmədova məruzəsində 2017-ci ildə Şəmkir Arxeoloji Ekspedisiyasının rəhbəri, t.e.d., professor Tarix Dostiyevin Milli Azərbaycan Tarixi Muzeyinin Numizmatika fonduna təhvil verdiyi, Şəmkir şəhərgahında aşkarlanmış VIII – XIII əsrlərə (Abbasilər, Eldənizlər, Səlcuqlular, Gürcüstan) aid mis sikkələr barədə məlumat verib və qeyd edib ki, belə sikkələr həmin dövrdə Azərbaycanda pul təsərrüfatı və ticarət əlaqələri barədə qənaətlər əldə etməyə yardım edir.

Konfransda həmçinin Rusiya Elmlər Akademiyası, Qırğızıstan, Tatarstan, Qazaxıstan, Özbəkistan, Almaniya və başqa ölkələrin alimləri iştirak ediblər. Konfrans materiallarının nəşri nəzərdə tutulub.