7 aprel 1906-cı ildə Tiflisdə nəşr olunan “Molla Nəsrəddin” jurnalı Azərbaycan ədəbi və ictimai fikir tarixində yeni bir səhifə açaraq, illüstrasiyalı satirik ədəbiyyatın ilk nümunəsi kimi fəaliyyətə başlamışdır. Jurnalın baş redaktoru böyük maarifçi yazıçı Cəlil Məmmədquluzadə, təsisçiləri isə Ömər Faiq Nemanzadə, Mirzə Ələkbər Sabir, Əbdürrəhman bəy Haqverdiyev, Əli Nəzmi və dövrün digər ziyalıları olmuşdur. “Molla Nəsrəddin” jurnalı 25 il ərzində müxtəlif dövrlərdə Tiflis (1906–1917), Təbriz (1921) və Bakı (1922–1931) şəhərlərində nəşr olunaraq geniş oxucu auditoriyasına çatmışdır. Jurnalın əsas məqsədi cəmiyyətdəki sosial ədalətsizliyi, mövhumatı, geriliyi kəskin satirik dillə ifşa etmək, maarifçilik ideyalarını yaymaq və xalq arasında ictimai şüurun formalaşmasına töhfə vermək olmuşdur.

Əlamətdar günlə bağlı Milli Azərbaycan Tarixi Muzeyinin ekspozisiyasında yer alan, milli satiranın zəngin nümunəsi kimi ziyarətçilərə təqdim olunan “Molla Nəsrəddin” jurnalının orijinal nüsxələrini təqdim edirik.