AMEA Arxeologiya və Antropologiya İnstitutu tərəfindən ilk dəfə “Könüllülük proqramı” çərçivəsində gənc könüllülərə muzeyşünaslıq sahəsində maarifləndirici tədbir keçirilib.

Milli Azərbaycan Tarixi Muzeyinin əməkdaşları-  muzeyin Elmi katibi, tarix üzrə fəlsəfə doktoru, dosent Sevinc Nəsirova “Dünya və Azərbaycan muzeyləri. Muzeylərin yaranma ənənəsi və muzey siyasəti”, Arxeologiya elmi-fond şöbəsinin müdiri, tarix üzrə fəlsəfə doktoru, dosent Nasir Quluzadə “Muzey ekspozisiyalarında arxeoloji materialların təqdimatı” və Elmi ekspozisiya və sərgilərin təşkili şöbəsinin müdiri Emin Dadaşov “Muzey ekspozisiyası və sərgilərdə ziyarətçini cəlb edə biləcək ‘qarmaq’ların (hooks) önəmi” adlı mövzularla çıxış ediblər.

“Könüllülük proqramı” akademik arxeologiyanın aktual problemləri ilə fənlərarası yanaşmaların əlaqələndirilməsi, interaktiv və praktik muzey fəaliyyəti, eləcə də turizm bələdçiliyi istiqamətində könüllülük fəaliyyətinə dəstək məqsədi daşıyır.

Tədbir zamanı iştirakçıların muzeyşünaslığa göstərdikləri maraq və innovativ yanaşmalar muzeyin mütəxəssisləri tərəfindən yüksək qiymətləndirilib.