Azərbaycan–Belarus mədəni əlaqələri çərçivəsində ölkəmizdə səfərdə olan Belarus Dövlət Ədəbiyyat Muzeyinin direktoru Sergey İvanoviç Usik Milli Azərbaycan Tarixi Muzeyini ziyarət edib. Muzeyin direktoru, akademik Nailə Vəlixanlı qonağı səmimiyyətlə qarşılamış və onu muzeydə görməkdən məmnun olduğunu bildirmişdir. Akademik N.Vəlixanlı muzeyin tarixi, fəaliyyət istiqamətləri, beynəlxalq əlaqələri barədə qonağa ətraflı məlumat verib. Görüş zamanı iki muzey arasında əməkdaşlıq imkanları və birgə layihələrin həyata keçirilməsi perspektivləri ətrafında da fikir mübadiləsi aparılıb. Sergey İvanoviç Usik muzeyin ekspozisiyası ilə tanış olmuş, Azərbaycanın qədim tarixi və zəngin mədəni irsi barədə yüksək təəssüratlarını bölüşmüşdür. Muzeyin yerləşdiyi tarixi bina, ekspozisiyada nümayiş olunan unikal kolleksiya qonaqda dərin maraq və heyranlıq doğurmuşdur.

Ziyarətin sonunda xatirə fotosu çəkilib, qonağa Milli Azərbaycan Tarixi Muzeyinin nəşrləri hədiyyə olunub.