Milli Azərbaycan Tarixi Muzeyində İranın Təbriz İslam İncəsənəti Universitetinin elmi-pedoqoji heyətinin üzvü, “Mirak Carpet” şirkətinin direktoru, İran xalçası dizaynerləri institutunun idarə heyətinin üzvü, xalça və miniatür sənəti sahəsində tanınmış xalçaçı rəssam, dünyanın müxtəlif ölkələrində bir çox nüfuzlu incəsənət mükafatlarına layiq görülmüş Karim Mirzəeə qonaq olub. Muzeyin direktoru, akademik Nailə Vəlixanlı Karim Mirzəeəni muzeydə görməkdən məmnunluğunu ifadə edib və Milli Azərbaycan Tarixi Muzeyinin zəngin irsi, fəaliyyəti və xüsusilə də xalça kolleksiyası barədə geniş məlumat verib. Görüş zamanı Azərbaycanın xalçaçılıq ənənələrinin qorunması və təqdimatı mövzusunda fikir mübadiləsi və gələcək əməkdaşlıq imkanları barədə müzakirələr aparılıb. Səmimi və işgüzar söhbətdən sonra qonaq muzeyin daimi ekspozisiyası ilə yaxından tanış olub, Azərbaycanın qədim dövrlərdən müasir dövrə qədər zəngin tarixi, mədəni irsi və bənzərsiz sənət nümunələri barədə ətraflı məlumatlandırılıb. Xüsusilə, xalçaçılıq sənəti və tətbiqi sənət nümunələri Karim Mirzəeənin böyük marağına səbəb olub. Ziyarət zamanı Karim Mirzaee muzeydə qorunan və nümayiş etdirilən xalçaların yüksək sənətkarlıq səviyyəsini, ornamentikasının zənginliyini və milli ruhu qoruma qabiliyyətini yüksək qiymətləndirib. O, həmçinin Azərbaycanın xalçaçılıq irsinin dünya səviyyəsində daha geniş tanıdılması üçün birgə layihələr təşkil etmək barədə təkliflərini də irəli sürüb.

Sonda xatirə fotosu çəkilib.