5–8 may 2025-ci il tarixlərində Naxçıvan Dövlət Rəsm Qalereyası, Naxçıvan Ədəbiyyat Muzeyi, Naxçıvan Heydər Əliyev Muzeyi və Naxçıvan Xatirə Muzeyinin baş fond mühafizləri Milli Azərbaycan Tarixi Muzeyinə ezam olunublar.

Səfərin əsas məqsədi muzey fondlarının idarə olunması, eksponatların qorunması və sənədləşdirilməsi sahəsində təcrübə mübadiləsi aparmaq və bu istiqamətdə peşəkar biliklərini artırmaq olmuşdur. Ziyarət çərçivəsində qonaqlara Milli Azərbaycan Tarixi Muzeyinin fond fəaliyyəti, eksponatların qeydiyyatı, inventarlaşdırılması, saxlanma şəraiti, rəqəmsallaşdırma prosesi və bərpa işləri barədə ətraflı məlumat verilib. Baş mühafizlər, həmçinin muzeyin müxtəlif fondlarının gündəlik fəaliyyəti, eksponatların elmi tədqiqi və mühafizəsi üzrə iş prinsipləri ilə yaxından tanış olublar. Təcrübə proqramı çərçivəsində iştirakçılar muzeyin bərpa laboratoriyasında tətbiq edilən müasir konservasiya və restavrasiya metodları barədə praktiki biliklər əldə ediblər. Əməkdaşlar arasında fikir mübadiləsi aparılıb, gələcəkdə muzeylərarası əlaqələrin və qarşılıqlı əməkdaşlığın inkişaf etdirilməsi imkanları müzakirə olunub.

Sonda ziyarət iştirakçılarına xatirə olaraq muzeyin nəşrləri təqdim olunub və xatirə fotosu çəkilib.