Muzeydə İkinci Dünya müharibəsi illərində faşizm üzərində Qələbənin 80 illiyinə həsr olunmuş  tədbir keçirilib.

Tədbirdə Azərbaycan Dövlət Dəniz Akademiyasının tələbələri,  C.Naxçıvanski adına Hərbi Liseyin kursantları, şagirdlər, muzey əməkdaşları iştirak ediblər.

Muzeyin Vətən Müharibəsi fondunun müdiri Şəfa Mövsümov çıxış edərək, faşizm üzərində Qələbəyə həsr olunmuş tədbirin tarixi yaddaşın qorunması, milli birlik və vətənpərvərlik dəyərlərinin təbliği baxımından mühüm əhəmiyyət daşıdığını qeyd edib.

Tədbirin bədii hissəsində “Gənc şairlər” ədəbiyyat layihəsinin üzvləri tədbirin mövzusuna uyğun şeirlər səsləndiriblər, Tatar Gənclər Mərkəzinin “Yaşlək” ansamblının üzvləri isə rəqs nümunələri ilə çıxış ediblər.

Tədbirin bədii rəhbəri muzeyin İnnovasiyalar və təhsil proqramları şöbəsinin baş mütəxəssisi Nigar Əhmədlidir. Tədbirdə həmçinin 1941–1945-ci illərdə faşizm üzərində qələbəni əks etdirən videoçarxlar və muzeyin kitabxanasında qorunan, qələbəyə həsr olunmuş kitablar nümayiş olunub.

Sonda bədii proqramda iştirak edən müəllimlər  və şagirdlər təşəkkürnamələr ilə təltif ediliblər.