Azərbaycan Milli Elmlər Akademiyası, Gənclər və İdman Nazirliyinin birgə təşkilatçılığı ilə “Faşizm üzərində qələbədə imzamız” mövzusunda gənc alim və tədqiqatçıların respublika elmi konfransı keçirilib. Konfransda muzeyin əməkdaşları- Vətən Müharibəsi fondunun müdiri Şəfa Mövsümov “İkinci Dünya Müharibəsi: Bakı nefti uğrunda beynəlxalq güclərin maraqlarına dair tədqiqatlar”, Etnoqrafiya fondunun elmi işçisi Aygün Quliyeva “Artilleriyaçı Mehdi Mehdiyevin döyüş yolu” , Hədiyyələr və xatirə əşyaları fondunun kiçik elmi işçisi Günel Məmmədova “Akademik Yusif Məmmədəliyevin faşizm üzərində qələbəyə töhfəsi (Milli Azərbaycan Tarixi Muzeyi materialları əsasında)”  mövzusunda məruzələrlə ilə çıxış ediblər.

Ş.Mövsümov məruzəsində Bakı neftinin ələ keçirmək üçün hazırlanan hərbi planlara aid əsərləri təhlil edib. A.Quliyeva Mehdi Mehdiyevin müharibə dövründəki qəhrəmanlığı barədə ətraflı məlumat verib. G.Məmmədova akademik Yusif Məmmədəliyevin İkinci Dünya müharibəsi dövründə elmi fəaliyyətinin strateji əhəmiyyətini önə çəkərək, onun bu sahəyə verdiyi töhfələri həm Milli Azərbaycan Tarixi Muzeyinin fondlarında qorunan arxiv sənədləri, həm də Rusiya arxiv materialları əsasında təqdim edib.

Məruzələr maraqla qarşılanıb, verilən suallar ətraflı cavablandırılıb.