18 may - Beynəlxalq Muzeylər Günü münasibətilə Milli Azərbaycan Tarixi Muzeyində Xəzər rayonu, Türkan qəsəbəsi 262 saylı tam orta məktəbin şagirdləri üçün “Tağıyev: Zamanı aşan irs” adlı maarifləndirici tədbir keçirilib. İCOM-un bu il üçün elan etdiyi “Sürətlə dəyişən icmalarda muzeylərin gələcəyi” şüarına uyğun olaraq reallaşdırılıb.
Tədbir çərçivəsində ilk olaraq İnnovasiyalar və təhsil proqramları şöbəsnin baş mütəxəssisi Qənirə Qafarlı tərəfindən Hacı Zeynalabdin Tağıyevin həyat və fəaliyyəti, onun təhsilə, mədəniyyətə və qadınların maariflənməsinə verdiyi töhfələr haqqında əhatəli mühazirə təqdim olunub.
Daha sonra interaktiv formatda quiz yarışması keçirilib. Şagirdlər arasında bilikləri möhkəmləndirmək və əyləncəli öyrənmə mühiti yaratmaq məqsədilə təşkil edilmiş yarışma İnnovasiyalar və təhsil proqramları şöbəsinin müdiri Fəridə Şəmsi, şöbənin əməkdaşları- Qənirə Qafarlı və İlahə Sarıyeva tərəfindən aparılıb.
Tədbir həm maarifləndirici, həm də əyləncəli formatda təşkil olunduğu üçün iştirakçılar tərəfindən böyük maraqla qarşılanıb.
Muzeyin təşkil etdiyi bu cür tədbirlər gənc nəslin milli irsimizə marağını artırmaqla yanaşı, muzeylərin müasir təhsil prosesində necə önəmli rol oynaya biləcəyini bir daha nümayiş etdirir.
