Milli Azərbaycan Tarixi Muzeyinin Etnoqrafiya elmi fond şöbəsinin elmi işçisi Fatma Qəniyevanın “Manifestation of Azerbaijan Hospitality in the Ceremonies of Ethnic Groups” (“Azərbaycan qonaqpərvərliyinin etnik qrupların mərasimlərində təzahürü”) adlı məqaləsi beynəlxalq indeksli  (ERIHPLUS, DOAJ, EBSCO, ASCI, MLA) Uluslararası Halkbilimi Araştırmaları jurnalında dərc olunub (Cild 8, Sayı 1, 2025. s. 75-83). Məqalədə Azərbaycanda qonaqpərvərlik ənənəsinin universal xarakter daşıması ilə yanaşı, bölgədən bölgəyə dəyişməsi, xalqın tarixi inkişafı, etnik müxtəliflik və ölkədə məskunlaşan xalqların birgəyaşayışı araşdırılıb. Həmçinin, azərbaycanlıların və etnik qrupların müxtəlif mərasimlərində təzahür edən qonaqpərvərlik adətinin oxşar və fərqli cəhətləri, transformasiyanın yaranması, adətin innovativ inkişafı tədqiq edilib.

Sözügedən məqalə F.Qəniyevanın  2024-cü ildə Azərbaycanın şimal və cənub bölgələrində olarkən bu ərazidə yaşayan etnik qrup nümayəndələri ilə müsahibə zamanı toplanan etnoqrafik materiallar əsasında yazılıb.