Azərbaycanın ənənəvi məişətində evin daxili interyerinin bəzədilməsinə hər zaman xüsusi önəm verilib, məişət əşyalarının estetik görünüşü daim diqqət mərkəzində olub. Toxuculuq və tikməçiliklə məşğul olan qadınlar məişət əşyalarını müxtəlif tikmə texnikaları ilə bəzəyir, inancları simvolizə edən damğa, nişan və duaları tekstil məmulatlarında əks etdirirdilər. Bu ənənənin bariz nümunələrindən biri Milli Azərbaycan Tarixi Muzeyinin Etnoqrafiya fondunda qorunan, Şəki bölgəsinə aid divar bəzəyidir. Sözügedən eksponat atlaz parçanın üzərində güləbətin tikmənin qabarıq texnikası ilə incəliklə işlənib.