Keçmiş məişət həyatında həm funksionallığı, həm də estetik görünüşü ilə seçilən məfrəşlər xüsusi yer tuturdu. Müxtəlif maddi nümunələrin, geyimlərin və yataq dəstlərinin mühafizəsi üçün istifadə olunan məişət əşyası sayılan məfrəş əsasən toxuculuq məmulatı olmaqla yanaşı, etnoqrafik baxımdan dəyərli xalq sənəti incisi sayılırdı.  Azərbaycan xalqının məişətində gəlinin ər evinə köçürülməsi zamanı özünün tikdiyi, toxuduğu və hazırladığı əşyalar məfrəşlərə yığılaraq, atla və ya araba ilə oğlan evinə aparılırdı.

Məfrəşlərin üzərində yer alan təsvirlərin – zoomorf, nəbati və səmavi simvolların qoruyucu gücə malik olduğuna inanılırdı. Məsələn, “göz” motivi pis nəzəri dəf etmək, “qoç buynuzu” gücü, “su” və “günəş” motivləri isə həyat və mübarizəni simvolizə edirdi.

Təqdim olunan sumaq rəngli yerliyin ətrafı qarmaqlı təsvirlərlə bəzədilmişdir. Bu  təsvirlərin mərkəzində romb fiquru, üst və alt hissələrdə isə kiçik romblarla tamamlanan, yan kənarlarında isə qarmaqlı həndəsi elementlər qayıq texnikası ilə toxunmuşdur. Məfrəşin alt – oturacaq hissəsi palaz toxunuşu ilə, sadə keçirmə və paralel dolama üsulu ilə hazırlanmışdır.

Qeyd edək ki, sözügedən eksponat Qazax bölgəsinə aiddir.