Azərbaycan Respublikasının Prezidenti İlham Əliyevin imzaladığı Sərəncama əsasən, Azərbaycan ədəbiyyatının görkəmli nümayəndəsi, şair Seyid Əzim Şirvaninin anadan olmasının 190 illiyinə həsr olunmuş ölkə üzrə silsilə tədbirlərin keçirilməsi nəzərdə tutulub. Şairin zəngin ədəbi irsinin tədqiqi və təbliği məqsədilə elmi konfranslar, sərgilər və ədəbi-bədii tədbirlər təşkil olunur.
Seyid Əzim Şirvani XIX əsr Azərbaycan ədəbiyyatında realizmin inkişafında mühüm rol oynamış, maarifçilik ideyalarının yayılmasına böyük töhfə vermişdir. Poetik nümunələrdən ibarət parlaq lirikasında mənəvi gözəlliyi tərənnüm edən şair, eyni zamanda, realist satiralarında dövrün aktual məsələlərinə kəskin münasibət bildirib, didaktik əsərlərində humanist ideyaların təbliğinə xüsusi diqqət yetirib. Şairin zəngin ədəbi irsi bu gün də aktuallığını qoruyur və Azərbaycan ədəbiyyatının parlaq nümunələri sırasında yer alır.
Əlamətdar günlə bağlı Seyid Əzim Şirvaninin Milli Azərbaycan Tarixi Muzeyinin Köməkçi materiallar fondunda qorunan fotoşəkilini təqdim edirik.