Azərbaycan Milli Elmlər Akademiyasının Arxeologiya və Antropologiya İnstitutunun təşkilatçılığı ilə görkəmli arxeoloq, AMEA-nın müxbir üzvü, tarix elmləri doktoru, professor İlyas Atababa oğlu Babayevin (1935–2017) 90 illiyinə həsr olunmuş “Antik dövrdə Qafqaz və ətrafında urbanizasiya prosesləri” mövzusunda beynəlxalq elmi konfrans keçirilib. Konfransda xarici və yerli alimlərlə yanaşı, Milli Azərbaycan Tarixi Muzeyinin əməkdaşları- Numizmatika fondunun baş mütəxəssisi, t.ü.f.d. Aygün Məmmədova “Professor İlyas Babayevin tədqiqatlarında yer alan Parfiya sikkələrinə dair yeni numizmatik qənaətlər” mövzusunda, Arxeologiya elmi-fond şöbəsinin böyük elmi işçisi, t.ü.f.d. Laçın Mustafayev “Antik Qəbələ şəhərinin bənzəri və təkrarı olmayan tikililəri” mövzusunda məruzə ilə çıxış ediblər. Məruzələr elektron təqdimatlarla müşayiət olunmuş, iştirakçılar tərəfindən verilən suallar ətraflı cavablandırılmışdır. Konfransın materiallarının xülasələri nəşr olunmuşdur.