Milli Azərbaycan Tarixi Muzeyinin Kitabxanası zəngin ədəbi irsimizin mühafizəsi və təbliği istiqamətində mühüm rol oynayır. Kitabxanada Azərbaycan ədəbiyyatı tarixinin öyrənilməsi, ədəbi-bədii nümunələrin və əlyazmaların toplanması sahəsində böyük xidmətləri olan görkəmli şair, ədəbiyyatşünas və biblioqraf Salman Mümtazın əsəri də qorunub saxlanılır. Salman Mümtaz tarixdə ilk dəfə üzərində “Azərbaycan ədəbiyyatı” yazılmış 16 kitabı nəşr etdirmişdir. Bu seriyanın birinci nəşri 1925-ci ildə çap olunmuş və Ağa Məsih Şirvaninin yaradıcılığına həsr edilmişdir. Görkəmli ədəbiyyatşünas ömrünü Azərbaycan ədəbiyyatının toplanmasına, tədqiqinə, sistemləşdirilməsinə və nəşrinə həsr edərək milli-mədəni irsimizin qorunmasında əvəzsiz rol oynamışdır.
Salman Mümtaz 1938-ci ildə repressiya qurbanı olmuşdur. Bununla belə, onun zəngin irsi bu gün də tədqiqatçılar və oxucular üçün qiymətli mənbə olaraq qalmaqdadır.