“Azərbaycan Hava Yolları”na məxsus “Embraer 190” təyyarəsinin Aktau şəhəri yaxınlığında qəzaya uğraması nəticəsində həlak olmuş Azərbaycanın Milli Qəhrəmanı İqor Kşnyakinin oğlu Oleq Kşnyakin ailə üzvləri ilə birlikdə Milli Azərbaycan Tarixi Muzeyini ziyarət edib. Oleq Kşnyakinə muzeyin ekspozisiyasında qorunan materiallar haqqında məlumat verilib və bildirilib ki, bu ilin yazında ekspozisiyada təyyarə qəzası nəticəsində həlak olmuş qəhrəmanların şəxsi əşyaları yerləşdirilib.

Qonaqlar Milli Qəhrəmanların xatirəsinin belə yüksək səviyyədə yaşadılmasına və onların şəxsi əşyalarının gələcək nəsillərə çatdırılmasına verdiyi töhfəyə görə muzey rəhbərliyinə və kollektivinə təşəkkür ediblər. Eyni zamanda, Milli Qəhrəmanların həyat yolunun gələcək nəsillərə nümunə olduğunu vurğulayıblar. Onlar bildirib ki, bu cür təşəbbüslər qəhrəmanlarımızın xatirəsinin əbədiləşdirilməsi və vətənpərvərlik ruhunun təbliği baxımından mühüm əhəmiyyət daşıyır.

Sonda Oleq Kşnyakin muzeyin rəy  kitabına öz ürək sözlərini yazdı.