Milli Azərbaycan Tarixi Muzeyi görkəmli bəstəkar, musiqişünas və ictimai xadim Üzeyir Hacıbəylinin 140 illik yubileyi çərçivəsində tədbirlərini davam etdirir. Muzeyin Azərbaycan tarixinin elmi tədqiqi və təqdimi şöbəsi tərəfindən “Üzeyir Hacıbəylinin publisistikasında milli və dini məsələlər” mövzusunda Azərbaycan Maliyyə-İqtisad Kollecində elmi seminar təşkil olunub. Tədbirdə sözügedən şöbənin əməkdaşı, t.ü.f.d., dos Ə. Fərhadov Üzeyir Hacıbəylinin dövrü mətbuatda dərc edilən məqalələrində əksini tapan milli oyanış, cümhuriyyətçilik, dini maarifçilik, təhsilin tərəqqisi və cəmiyyətin mənəvi inkişafı məsələləri haqqında geniş məlumat verib. Məruzə zamanı Üzeyir Hacıbəyli irsinin muzeydəki təbliği məsələsinə də toxunulub. Ə. Fərhadov iştirakçılara dahi bəstəkarın muzeyin fondlarında mühafizə olunan eksponatları haqqında ətraflı danışıb.