Milli Azərbaycan Tarixi Muzeyinin Numizmatika Fondunda 1955-ci ildə Qarabağın Mardakert (indiki Ağdərə) rayonunun Atyork (indiki Həsənriz) kəndində aşkar edilən və 381 ədəd sikkədən ibarət olan qiymətli dəfinə qorunur. T.e.d., professor Əli Rəcəblinin (1927 - 2022) numizmatik təyinatı əsasında dəfinədə Səfəvi hökmdarları - II Abbas, I Süleyman, Hüseyn, II Təhmasib və Osmanlı hökmdarı III Əhməd dövrünün gümüş sikkələri müəyyən edilmişdir. 80 ildən artıq dövrü əhatə edən dəfinədə Gəncə, Naxçıvan, Şamaxı, İrəvan, Təbriz, Qəzvin, Huveyzə, Tiflisdə zərb edilmiş gümüş sikkələr (şahi, məhəmmədi, abbası və d.) dövrün pul təsərrüfatı və ticarət əlaqələri haqqında məlumat toplamağa kömək edir. Dövrün fərqli çəkili sikkələrinə isə ərəb qrafikası ilə hökmdar adı, titulu, dini yazılar, zərb yeri və rəqəmlərlə zərbolunduğu il həkk edilirdi.