Çoxşaxəli yaradıcılığa malik olan professor Aida İmanquliyeva ictimai həyatda da geniş fəaliyyət dairəsinə sahib olub. Elmi fəaliyyətində üç monoqrafiya və 70-dən çox elmi məqalə müəllifi olan Aida İmanquliyeva, həmçinin Şərq filologiyasına dair bir çox əsərin redaktoru olub. A.İmanquliyevanın tədqiqatları və əsərləri Azərbaycanla yanaşı, ölkə hüdudlarından kənarda da böyük maraqla qarşılanıb.

Akademik Aida İmanquliyevaya aid Milli Azərbaycan Tarixi Muzeyinin Sənədli mənbələr fondunda qorunan dəyərli materialları təqdim edirik. Həmin nümunələr arasında 2014-cü ildə AMEA Rəyasət Heyəti və Z.Bünyadov adına Şərqşünaslıq İnstitutu tərəfindən Aida İmanquliyevanın anadan olmasının 75 illiyi münasibətilə keçirilmiş “Şərq xalqları ədəbiyyatı: ənənə və müasirlik” Beynəlxalq konfransının proqramı və dəvətnaməsi də yer alır.