Bakının azad edilməsi Azərbaycan dövlətçiliyi tarixində müstəqilliyin möhkəmlənməsində mühüm əhəmiyyətə malikdir.

Əlamətdar günlə əlaqədar Milli Azərbaycan Tarixi Muzeyinin Köməkçi tarixi fənn materialları fondunda qorunan Məcidiyyə nişanını təqdim edirik. Günəş formasında olan gümüş nişanın yuxarı hissəsində beşguşəli ulduz, aypara təsvir olunub və üzərində qızılı rəngli ərəb qrafikası ilə – “səadət”, “qeyrət”, “hamiyyət” və “1268” (m. 1851-ci il. Nişan Osmanlı sultanı Əbdülməcidin hakimiyyəti dövründə təsis edilmişdir) həkk edilmişdir. Dairənin daxilində Osmanlı tuğrasının təsviri, nişanın arxa tərəfində isə aypara daxilində Osmanlı zərbxanasının möhürü ("Zərbixanə Əmiri") vardır.

Məlumdur ki, 1918-ci ildə Azərbaycan Cümhuriyyətinə hərbi kömək göstərmək üçün Qafqaz İslam Ordusu yaradılmışdır. Azərbaycanda həmin dövrdə təltif nişanları olmadığından Azərbaycan hərbçiləri də Osmanlı dövlətinin orden və medalları ilə təltif edilirdi. Hazırda Türkiyə Cümhuriyyətinin hərbi arxivlərində azərbaycanlı hərbçilərin təltifləri barədə məlumatlar olan sənədlər qorunur.