Qafqaz tarixçisi Semon Mixayloviç Bronevski - (1763-1830) tərəfindən qələmə alınmış “Qafqaz haqqında yeni coğrafi və tarixi xəbərlər” (Новейшие географические и исторические известия о Кавказе) adlı kitabın nüsxəsi Milli Azərbaycan Tarixi Muzeyinin Kitabxanasının Nadir kitablar fondunda mühafizə olunur.
1823-cü ildə nəşr olunmuş kitabda azərbaycanlılar və digər Qafqaz xalqları haqqında geniş tarixi və etnoqrafik faktlar öz əksini tapır. Əsərdə Azərbaycanın Bakı, Quba, Şamaxı, Şirvan və Şəki bölgələrində yaşayan əhalinin sayı, onların əsas məşğuliyyət sahələri, ticarət və sənaye fəaliyyəti, coğrafi xüsusiyyətləri, adət-ənənələri və dini mənsubiyyətləri barədə ətraflı məlumatlar təqdim olunur. Müəllifin kitabda qeyd etdiyi maraqlı tarixi faktlardan birinə əsasən, həmin dövrdə Bakı şəhərində təxminən 500 ev mövcud idi və burada 3000 nəfər əhali yaşayırdı.